رسالة محمد عبدالمنعم للاعب المقاصة المعتزل: متخليش حاجة توقفك عن حلمك
وجه محمد عبدالمنعم مدافع الأهلي ومنتخب مصر، رسالة مهمة إلى محمد عادل أمو لاعب المقاصة، الذي قرر، أمس الاثنين، تعليق حذائه واعتزال كرة القدم.
عبدالمنعم للاعب المقاصة المعتزل: متخليش حاجة توقفك عن حلمك أو تاخد قرار غلط
وكتب عبدالمنعم عبر حسابه الرسمي على مواقع التواصل الاجتماعي "إنستجرام": "متخليش حاجة توقفك عن حلمك موقف زي ده يقويك مش يخليك تاخد قرار غلط".
وأضاف: "لسه المشوار طويل ومحتاج نفس طويل اشتغل واتعب وأكيد ربنا كاتبلك حاجة أحسن بكتير".
وكان محمد عادل أمو لاعب مصر المقاصة، أعلن. مساء أمس الإثنين، اعتزاله كرة القدم نهائيًا، بسبب تعثر انتقاله لناديي الإسماعيلي والمصري في الميركاتو الصيفي الجاري، بعد غلق باب القيد في الساعات الأولى من صباح، اليوم الثلاثاء.
يذكر أن أمو من مواليد 1999 وتم تصعيده من قطاع الناشئين بنادي المقاصة إلى الفريق الأول، الذي هبط إلى دوري الدرجة الثانية الموسم الماضي.
ويجيد اللاعب في مركز الجناح، وظهر بشكل جيد رفقة الفريق الفيومي.
وكان محمد أمو لاعب المقاصة، كشف تفاصيل الأزمة التي يعاني منها، عبر حسابه على موقع التواصل الاجتماعي فيسبوك، بعد فشل انتقاله إلى فريق المصري أو الإسماعيلي، قبل غلق باب القيد منتصف الليل.
وقال أمو عبر حسابه الشخصي بـ"فيس بوك": فاضل ساعات على القيد وأنا مخلصتش في أي مكان بعد ما مضيت في فرقتين مصري وإسماعيلي وكنت بتعامل مع كل الناس بثقة كبيرة جدًا مضيت للمصري وفضلت منتظرهم يدفعوا شيكات النادي ويخلصوني أنا مضيت للمصري قبل كابتن إيهاب ما يمسك الفرقة أول حاجه قولتها لوكيلي بعد كابتن إيهاب ما بقي المدير الفني قولتلو أنا مستعد أتنازل عن أي حاجة بس أروح مع كابتن إيهاب أي حد يعرفني يعرف إني بحب كابتن إيهاب جلال جدا جدا وإن كابتن إيهاب أكتر واحد ساعدني في حياتي".
وأضاف: "قعدت أكتر من أسبوعين منتظر المصري يدفع الشيكات لما حسيت إن مبقاش في اهتمام من المسؤولين في المصري كلمت وكيلي قولتلو هروح أي مكان تاني قالي الإسماعيلي عايزك وانا بحب الإسماعيلي جدا جدا وافقت على طول وقعدت مع البشمهندس يحيي الكومي ومضيت واتفقت على فلوسي وكانت المشكلة فلوس النادي بس عملت كل حاجة ممكن أعملها قالولي هتستني علي فلوسك عشرين يوم قولتلهم مفيش مشكلة عادي ادفعوا فلوس النادي وخلصوني ومش هنختلف على أي حاجة اللي حضراتكم عايزينه أنا هوافق عليه عشان أحقق حلم من أحلامي والعب في النادي الإسماعيلي كنت مستعد أعمل أي حاجة عشان الموضوع يتم خلينا النادي بتاعي يوافق علي إنه ياخد الفلوس أقساط مع أن النادي في ظروف صعبة ومحتاج كل جنيه يدخل النادي يكون كاش عشان يقدر يحل أزمته ويفك القيد عملت كل حاجة عشان الإسماعيلي يطلعوا شيكات النادي وكانت كل حاجه فعلا كويسه آخر يوم في القيد قالوا لوكيلي مش هنقدر نخلص عشان مافيش في النادي فلوس".
وأتم: "أنا حاليًا مروحتش نادي كلمت كل أندية الدوري كل الأندية قفلت القائمة بتاعتها ربنا يسامح كل الناس اللي كانت سبب في اللي أنا وصلتله ده أنا قررت ملعبش كورة مرة تانية وبشكر كل الناس اللي حاولت تساعدني وأتمنى ميكونش في أي شخص زعلان مني وبشكر كابتن وليد هويدي والنادي بتاعي ربنا معاكو ويوفقكم وإن شاء الله تصعدوا مرة تانية أنا واثق جدا إن اللي حصلي ده خير وراضي جدا لكن لأسباب شخصية أنا مش هقدر ألعب كورة مرة تانية.. شكرًا".
