لاعب المقاصة يفجر مفاجأة ويعلن اعتزاله كرة القدم
في مفاجأة كبيرة، أعلن محمد عادل “أمو”، لاعب مصر للمقاصة، عن اعتزاله كرة القدم بسبب عدم انتقاله لأى فريق قبل غلق باب القيد بساعات قليلة.
وجاء ذلك بعدما أكد اللاعب أنه وقع للمصري والإسماعيلي قبل أن يستغنا عنه، ولم ينجح في الانتقال لأى فريق قبل غلق باب القيد الساعة 12 صباحًا.
وقال أمو عبر حسابه الشخصي بـ“فيسبوك": “فاضل ساعات علي القيد وأنا مخلصتش في أي مكان بعد ما مضيت في فرقتين مصري والإسماعيلي وكنت بتعامل مع كل الناس بثقة كبيرة جدًا مضيت للمصري وفضلت منتظرهم يدفعوا شيكات النادي ويخلصوني أنا مضيت للمصري قبل الكابتن إيهاب ما يمسك الفرقة أول حاجه قولتها لوكيلي بعد الكابتن إيهاب ما بقي المدير الفني قولتلوا أنا مستعد أتنازل عن أي حاجة بس أروح مع الكابتن إيهاب أي حد يعرفني يعرف إني بحب الكابتن إيهاب جلال جدا جدا وإن الكابتن إيهاب أكتر واحد ساعدني في حياتي”.
وأضاف: “قعدت أكتر من إسبوعين منتظر المصري يدفع الشيكات لما حسيت إن مبقاش فيه اهتمام من المسئولين في المصري كلمت وكيلي قولتلوا هروح أي مكان تاني قالي الإسماعيلي عايزك وأنا بحب الإسماعيلي جدا جدا وافقت علي طول وقعدت مع الباشمهندس يحيي الكومي ومضيت واتفقت علي فلوسي وكانت المشكلة فلوس النادي بس عملت كل حاجة ممكن أعملها قالولي هتستني علي فلوسك عشرين يوم قولتلهم مافيش مشكلة عادي ادفعوا فلوس النادي وخلصوني وأنا مش هنختلف علي أي حاجة اللي حضراتكم عايزينه أنا هوافق عليه عشان أحقق حلم من أحلامي واللعب في النادي الإسماعيلي كنت مستعد أعمل أي حاجة عشان الموضوع يتم خلينا النادي بتاعي يوافق علي أنه ياخد الفلوس أقساط مع إن النادي في ظروف صعبة ومحتاج كل جنيه يدخل النادي يكون كاش عشان يقدر يحل أزمته ويفك القيد عملت كل حاجة عشان الإسماعيلي يطلعوا شيكات النادي وكانت كل حاجة فعلا كويسة آخر يوم في القيد قالوا لوكيلي مش هنقدر نخلص عشان مافيش في النادي فلوس”.
وأتم: “أنا حاليًا مروحتش نادي كلمت كل أندية الدوري كل الأندية قفلت القائمة بتاعتها ربنا يسامح كل الناس اللي كانت سبب في اللي أنا وصلتلو ده أنا قررت ملعبش كورة مرة تانية وبشكر كل الناس اللي حاولت تساعدني وأتمني ميكونش في أي شخص زعلان مني وبشكر كابتن وليد هويدي والنادي بتاعي ربنا معاكو ويوفقكم وإن شاء الله تصعدو مرة تانية أنا واثق جدا إن اللي حصلي ده خير وراضي جدا لكن لأسباب شخصية أنا مش هقدر ألعب كوره مرة تانية شكرًا”.
