عمرو أديب يهاجم سيد عبدالحفيظ: إنت جواك سواد.. وخروجك من الممر الشرفي «حركة بلدى»

انتقد الإعلامي عمرو أديب، سيد عبد الحفيظ، مدير الكرة للفريق الأول للنادي الأهلي، لعزوفه عن العبور بالممر الشرفي الذي نظمه لاعبو الزمالك للاعبي الأهلي عقب تتويج الأبيض ببطولة كأس مصر.

وقال عمرو أديب، خلال تصريحات تليفزيونية، ببرنامج "الحكاية"، عبر قناة "إم بي سي مصر"، إيه اللي عملته ده يا سيد إنت مدير كرة في نادي كبير، إنك تمشي بره ممر الشرف "حركة بلدي مفيهاش أي أخلاق رياضية".

وتابع: هما كانوا عايزين منك إيه في الممر.. كانوا هيصقفولك.. مشيرا إلي أن مدير الكرة عمل حركة اللي المفروض لو لاعب عنده عمله يتعاقد لكن مين يعاقب سيد عبد الحفيظ.

وأكمل: لازم تبقي قدوة يا سيد.. إنت جواك سواد، ما تخسر يا أخي دي رياضة ولازم تكون نموذج كده غلط يا عبد الحفيظ.

وواصل: يجب علي اتحاد الكرة ومحمود الخطيب يعاقبوا سيد عبد الحفيظ.. الأهلي مفيش علي رأسه ريشة.

وأردف: لما الأهلي يكسب الزمالك لازم نشرب المر طول الليل.. لكن لما نكسب عاوزينا نسكت مصر طلع فيها زملكاوية كتير أوي.

وأختتم: أنا من حقي احتفل وأفرح إحنا كسبنا بشرف وأحلي من الشرف مفيش واللي عمله مدير الكرة بالنادي الأهلي يخلي الناس تفهم الكيد والسواد.

وتوج الزمالك ببطولة كأس مصر نسخة 2021.. بعد فوزه علي النادي الأهلي بهدفين لهدف، في المباراة التي جمعتهما علي استاد القاهرة الدولي.