رسميًا.. بطلة ألعاب القوى بسنت حميدة تعلن غيابها عن أولمبياد طوكيو

أعلنت العداءة المصرية بسنت حميدة رسميا غيابها عن أولمبياد طوكيو بسبب الإصابة.

وكانت اللاعبة قدر تعرضت لإصابة في العضلة الخلفية في آخر مران لها قبل السفر لطوكيو لكنها قالت إنها ستخضع للتأهيل تحت إشراف دكتور حسن كمال، رئيس اللجنة الطبية باللجنة الأولمبية من أجل اللحاق.

وكتبت بسنت عبر حسابها: صحيح الأزمة اللي مريت بيها كانت كبيرة وصعبة بس من نعمة ربنا عليا وجود ناس جمبي بتحبني وبتخاف عليا بالشكل اللي شوفتوا كمية الناس اللي بعتتلي رسايل محفزة جدا ليا وكتبتلي كومنت ونزلتلي ستوري وكلمتني ودعتلي عمري م كنت اتخيلها أبداً ولا أتصور أن ممكن يكون في ناس كتير كدا حواليا بتحبني من قلبها بجد.

وأضافت : أنا آسفة جدا اعذروني إني مقدرتش أرد على كلامكم ورسايلكم العظيمة  ليا، بس أنا الفترة اللي فاتت كنت غير مُتزنة نفسياً، ويمكن دي من أصعب الفترات اللي ممكن تمر عليا ف حياتي بس الحمد لله على كل شىء... أؤمن تمامًا أنها البداية في مشواري الرياضي وليست النهاية، بالرغم من صعوبة الموقف وعدم قدرتي الآن علي تخطيه ولكن ربنا كريم جداً...التأهل الأولمبي لطوكيو كان نعمة عظيمة وأيضاً الإصابة المفاجأة وعدم القدرة على المشاركة ف آخر وقت نعمة كبيرة من الله حتي وإن كُنت لا أراها الآن فرب الخير لا يأتي إلا بالخير الحمد لله دائما وأبداً، سعيدة وفخورة بكل خطوة في رحلة التأهيل الأولمبي حتي وإن لم تكتمل في مرحلتها الأخيرة ولكن السعادة متعتها ف الرحلة وليست فقط ف الوصول، شكراً مدربي العظيم على مساندتك ودعمك ليا طول الطريق ف الوقت الصعب قبل وقت النجاح، شكرً للاتحاد المصري لألعاب القوي على المجهود المبذول والدعم الكامل طول الوقت، شكرا لأهلي وأصحابي وكل الناس اللي حتي معرفهاش اللي وقفت جمبي الفترة اللي فاتت كلها وشجعتني وبعتتلي كلام من أعظم ما يكون بجد كلامكم فرق معايا جدا أنتم أكبر نعمة في حياتي أنا ممتنة ليكم جداً وبحبكم أوي، دعواتكم بالتوفيق فيما هو قادم بإذن الله شكراً......