«مؤامرة».. لاعبة منتخب الطائرة الشاطئية تكشف كواليس استبعاد مصر من التصفيات المؤهلة لطوكيو

كشفت دعاء الغباشي لاعبة منتخب مصر للكرة الطائرة الشاطئية، عن استبعاد المنتخب من الكأس القارية بالمغرب والمؤهلة لأوليمبياد طوكيو رغم وصول منتخب السيدات لنصف نهائي البطولة.

وكانت مصر قد وصلت أمس إلى نصف نهائي البطولة لتواجه نيجيريا وعلى الطرف الأخر تأهلت المغرب البلد المستضيف للبطولة بجانب كينيا، ليتنافس الفرق الأربعة على بطاقة التأهل لأوليمبياد طوكيو.

وقالت دعاء عبر حسابها على فيسبوك: بكل هدوء إحنا لاعيبه حلمنا من ٢٠١٦ نتأهل أوليمبياد وبقالنا ٥ سنين بنتمرن عشان البطولة دي تيجي البطولة وتكون في المغرب اللى هي البلد المنافس أصلًا عملنا مسحه قبل ما نسافر طلعت سلبي وماسحه اول ما وصلنا وبرضه طلعت سلبي وقايلين كلهم إن اغادير مفهاش كورونا وأنهم بيعملو كده عشان يحافظو علي البلد اول ما وصلنا اتعمل مسحه وفضلنا ٣ أيام في الغرف عشان النتيجة تطلع  ومرضوش يخرجونا من الغرف غير لما النتيجة تطلع وطلعت سلبي الحمد لله من ٣ أيام فجاه قالو كله ينزل يعمل مسحه مع إنهم اصلا مكنوش قايلين إن في مسحه هتتعمل تاني عشان المفروض إننا في فقاعه فقاعه في فندق فيه ١٠٠ ألف شخص ونصهم سياح بره البطولة إمبارح الساعه ١١ بليل بتوقيت مصر ١٢ قالو مصر متخرجش بره الغرف عندهم حاله.. إزاي وامتى وكلنا كويسين قلنالهم مين قالوا مدرب منتخب الرجال.

وتابعت: طب هنعمل إيه يا جماعه قالوا هنلعب لحد ما اللجنة الطبية تاخد قرار ماتشنا النهارده الساعه ٩ الصبح طبعًا نمنا كلنا اللاعيبه بعد ما اتاكدنا اننا هنلعب بعد توتر وعياط وصويت.. فجأة نصحي علي رساله الساعه ٣:٣٠ توقيت مصر ٤:٣٠ متخرجوش من الغرف انتم بره البطولة.. يرضي مين ده يا عالم يرضي مين.

وواصلت: دي لعبة وإحنا متاكدين منها المدرب سليم ومع العلم ممنوع حتي نجيب حد يعملنا مسحات جديدة ولا حتي فكروا يعيدوا المسحة ولا أصلًا شوفنا ورق المدرب اللي بيقولوا إنه ايجابي، احنا ماتشنا الساعه ٩ الصبح يعني كام ساعه ماتش ضامنينه  نكسبه نكون في النهائي احنا مخالطين جميع اللاعبين ومخالطين فرقه المغرب والفرق اللي لعبناها والحكام والناس اللى في المدرجات الي هما منظمين احنا مخالطين رئيسه الاتحاد الإفريقي اللي هي رئيسة اتحاد المغرب أصلًا  يعني لو في فعلا حق يبقي المنتخبات كلها يتعملها ماسحه اشمعنى مصر هي اللى إيجابي ولو ايجابي هتبقي إيجابي من مين من نفسها يعني.. حد يلحقنا والنبي إحنا حلمنا فجاه بقي تراب ومش عارفين نعمل حاجه يا رب إنت حسبي ونعم الوكيل.