رئيس مجلسي الإدارة والتحرير
محمد الباز

ميدو يطالب الدولة بوضع سقف لعقود اللاعبين والإعلاميين

ميدو
ميدو


وجه أحمد حسام ميدو نجم الزمالك ومنتخب مصر الأسبق، رسالة هامة للمسئولين عن إدارة ملف كرة القدم في مصر، مطلبا بضرورة وضع سقف لعقود اللاعبين والمدربين في الدوري المصري.

وكتب ميدو عبر حسابه الرسمي على مواقع التواصل الاجتماعي"تويتر:" "أكثر حاجه لازم الدولة تعلمها أن لازم يحصل تعديل في الموازنة العامة لازم الصحة والتعليم يتخصص لهم نسبة اكبر بكتير لازم يتم تخفيض عدد الموظفين الحكوميين لازم الفلوس اللي بتتصرف على الكورة والإعلام والفن يتم تخفيضها بشكل كبير!! لازم بتعمل سقف مرتبات للاعبين والمدربين والإعلاميين!".

وأضاف: "ماينفعش العاملين بالقطاع الصحي والقطاع التعليمي يبقوا بيعانوا واللاعبين والمدربين والإعلاميين والفنانين بيتقاضوا مئات أضعافهم.. وهنا الموضوع مش موضوع أرزاق.. موضوع عدل!! لازم يبقى في نسبه وتناسب.. لازم نستغل الظروف اللي بنمر بيها وحاجات كتيره تتعدل!!".

وواصل ميدو: "مثلا ماينفعش لاعيب او مدرب في الدوري المصري المتواضع جدا فنيا يكون دخله مئات أضعاف العاملين في القطاع الصحي والقطاع التعليمي بالذات.. اه لاعيب الكورة والمدرب لازم يتم تقديره بشكل جيد لانها موهبة ومهنة صعبة جدا لكن الفروق لازم ماتكونش بعيده اوي كده!!".

وأوضح نجم الزمالك الأسبق: "مثلا زوج أختي دكتور مخ وأعصاب في مستشفى كبيرة جدا وعندما علمت عن دخله السنوي صعقت!! ازاي واحد درس سبع سنين طب موت نفسه فيهم وبيشتغل أقل حاجه ١٦ ساعة في اليوم يكون ده دخله!! على فكرة ده الوضع في العالم كله مش في مصر بس.. في رأيي ان كل ده لازم يتغير!!". 

وأتم: "لازم الوزير أشرف صبحي والأستاذ عمرو الجنايني يشتغلوا اه مفيش عقد لأي لاعب او مدرب يتم اعتماده الا بسقف معين يزيد كل ٣ سنوات السقف ده ١٥ ٪.. الأندية المصرية كلها بلا استثناء بتخسر ملايين.. وأيه العائد؟ مفيش اي عائد!! دوري تعبان من غير جمهور بيفرز ٢ او ٣ لاعيبه مميزين كل موسم!!.